Revelation of John 18
Yaubada me Babiloni i leodi.
1Vavine a 'iseni 'ana 'aseta kumanina 'atamana Babiloni, mulieta wata a 'isanago tamu anelose a 'iseni abamega i obuobuma. Basenadi Yaubada veimea bwaikina i veleni bega i 'awaiaia fwayafwaya matatabuna i magetai. 2I toke i vegole ava'ai 'awaie i na souyeniga faifaina i vo,Babiloni 'atamana bwaikina i da kuali i kuali.
Nani sakoidi i luvili bani'odi yaiaina, yalua maigikolokololodi wata manuga sakoidi.
3I kualiga fai fwayafwaya 'ana toveimea bwaikidi yadi tomotoga fuedi taiadi nuadi i 'ewadi i nagoi 'waineye, i vevesauluva sakoina wata yaubada-vekavekali 'waidie i 'odu'odu, 'wa da vo bani'odi vavine ufa toketokena i da veledi taiadi i da sakona.
We'e fwayafwaya 'ana nuanua 'waineye bwaikina nuanuana kukua fuedi, begaidi tomotoga fuedi yadi kukua i vevekimwaneyedi 'waineye bega mani bwaikina i veveluagadi.”
4Wata tamu bona a nogai abamega i vonavona 'atamananina faifaina i vo,
Yaku tomotoga, 'wa na souyemi 'atamananina 'wainega, vavinenina 'wa na baileni kebu 'wa na sakosakona taunina bani'odi.
Kebu nuanuaku 'ana vematavulogayega 'omi wata a na luvematavulogimi.
5Mogitana vematavuloga i na veluagai fai yana sakona fueotogidi i 'udili i laka abame, Yaubada i nuanuanidi.”
6Wata yana anelose i vona i vo,
'Atamana Babiloni vavine toalagogona bani'odi i vesauluva-sakoina yaku tomotoga 'waidie, 'omi wata bani'odi 'wa na vesauluva sakoina 'waineye.
Sakona 'aitamogana 'aitamogana i 'idewadiga, wata 'omi 'wa na tutula 'ailuga 'ailuga.
Nani sakoidi bani'odi ufa toketokena ma vedina i 'idewai yaku tomotoga faifaidi, 'omi wata bani'odi vedi 'ailuga 'wa na 'idewadi 'wa na veleni i na yemu, 'ana vematavuloga.
7Yana 'ai'aiwabu faifaidi ma yana vebaisa taunina i awa'ai'aia, 'omi vita wata nuavita 'wa na veleni yana 'ai'aiwabunidi bwaikidi 'adi fata bani'odi.
I lubwaineni vitanidi i na veluagadi fai tutuya fuedi taunina i awa'ai'aia i vo, Yau kwini toketokeku, kebu vita wata nuavita a na veluagadiga 'wabu'wabulavo i veveluagadiga bani'odi.”
8Yana vonanina faifaina vita fuedi i na veluagadi 'aiata 'aitamogana nageneye, bani'odi viga sakoina, vemogai wata loka.
'Auvea Yaubada toketokeotogina, i na veimea vematavuloga i na veluagai 'ai i na 'ala'a'avai.”
9Fwayafwaya 'ana toveimea bwaikidi, kumanidiavo vavinenina taiadi i sakosakona wata i sosoana-'avo'avovo yana 'ai'aiwabu faifaidi, lufwana i na 'iseni, faifaina nuadi i na vita i na 'we'wela. 10'Ana vematavuloga faifaina i na kololo 'ani'ie i na tovoi bega i na vona i na vo,
Ieu, nuakalikalina 'atamana bwaikina wata toketokena.
'Atamana Babiloni tutuya 'ale'usaotogina nageneye vematavuloga i veluagai i 'a'ava-matayo'o.”
- S4 2 Kol 6:17S6 2 Tes 1:6S8 Ve 11:17-18S9-10 Ve 19:2-3
Ieu, nuakalikalina 'atamana bwaikina.
Taunina i 'i'ivivigavuya kaleko 'avu'avudiega, bakabakadiega, yamoyamoidiega, golida 'wainega, kileu wata bida 'adi tutula bwaikidi 'waidiega.
17Tutuya 'ale'usana yana 'ai'aiwabunidi matatabuna i 'a'ava-matayo'o.”
Wata toniwaka matatabudi, waka 'ana tofolovavo wata tomotoga i dodoga wakanidi 'waidie toyaubani taiadi 'ani'ieyega lufwana i na 'iseni ma yadi nuavita i na 'we'wela i na vo, No'o 'atamananina bwaikina, kebu tamu 'atamana bani'odiga.” 19Taunidi fwayafwayayega i na ivudi, i na vemogai wata i na tainuanuai i na vo,
Ieu nuakalikalina, 'atamananina vita bwaikina i veluagai.
Toniwaka matatabudi 'atamananina 'wainega 'ai'aiwabu bwaikina i veveluagadi, siwe i simatayo'oimo yana 'ai'aiwabu i 'a'ava i sako-vagata.
20We'e 'omi tomia abama 'wa na sosoana vematavuloga i veleniga faifaina.
'Omi Yaubada yana tomotoga, yana tomata'aulelevo wata yana tolu'ivonavo, 'wa na sosoana fai 'atamananina 'wainega vita 'wa veluagai siwe 'akonadi Yaubada vematavuloga i veleni 'ami vita 'adi tutula.”
21I 'a'avana mulieta tamu anelose toketokena kileu bwaikaotogina i silakai i toke i taweni malaveseye i vona i vo,
De'e kileunina a taweniga kebu 'wa da 'ise'iseni, wata bani'odi Babiloni 'atamana bwaikina i na toke i na leodi i na 'a'ava, kebu wata tamu aitoi i na 'ise'iseniga.
22'Atamananina yana sosoana i na 'a'ava kebu wata tamu ava'ai bonana ta na noganogai bani'odi lauinava gitayega, 'umo wata evulega.
Wata tofolova kebu tamu ava'ai i na 'idewaiga nageneye, wata kebu 'ana fata sakoli butu'aidi ta na noganogaidi.
23Kebu tamu mageta bei ta na 'ise'iseni, wata nagi 'ana bonabonana i na 'a'ava.
Vona mogitana 'atamananina 'ana tovekimwane matatabudi i 'edakumetaotoga tomia fwayafwaya matatabudi 'waidiega, wata 'afo'a 'wainega tomotoga fuedi i vekaliedi, siwe 'akonadi toketokenanidi matatabuna i 'a'ava.
24'Atamananina Babiloni vematavuloga i veluagai fai basenadi bei Yaubada yana tomotoga wata yana tolu'ivonavo i luvewafadi. Vona mogitana, tomotoga matatabudi i tokemaiga Yaubada faifaina i wafa 'atamana fuedi 'waidie siwe dayagidi 'wa da vo i da iloilolo 'atamananina 'waineye.”
- S20 Ve 19:1-2
Copyright information for
YML